Мемлекеттік жалдамалы тұрғын үй Қазақстан Республикасының азаматтарына және қандастарға тұрғын үйге мұқтаж ретінде есепте тұрған жағдайда беріледі.

Тұрғын үйді бөлу Отбасы банкінің жүйесі арқылы есепке қою күніне және отбасының табыс деңгейіне қарай автоматты түрде жүзеге асырылады.

Тұрғын үйлердің бір бөлігі басым тәртіппен әлеуметтік осал санаттағы азаматтарға бөлінеді.

Мемлекеттік жалдамалы тұрғын үй Қазақстан Республикасының азаматтарына және тұрғын үйге мұқтаж ретінде есепте тұрған қандастарға беріледі.

Бөлу Отбасы банкінің ақпараттық жүйесі арқылы Бірыңғай республикалық электрондық база мен «Тұрғын үймен қамтамасыз ету орталығы» базасының деректері негізінде автоматты түрде жүзеге асырылады. Бұл ретте есепке қою күні мен өтініш берушінің табыс деңгейі ескеріледі.

Мемлекеттік жалдамалы тұрғын үйлердің кемінде 70%-ы жыл сайын келесі санаттағы азаматтар арасында бөлінеді:
– Ұлы Отан соғысының ардагерлері;
– жеңілдіктері бойынша оларға теңестірілген ардагерлер;
– басқа мемлекеттердің аумағындағы ұрыс қимылдарының ардагерлері;
– I және II топтағы мүгедектігі бар адамдар;
– мүгедектігі бар балаларды тәрбиелеп отырған отбасылар;
– жесірлер мен жесір қалған ер адамдар;
– «Алтын алқа», «Күміс алқа» алқаларымен, сондай-ақ «Ана даңқы» I және II дәрежелі ордендерімен марапатталған көпбалалы аналар;
– көпбалалы отбасылар;
– жетім балалар және ата-анасының қамқорлығынсыз қалған балалар.

Жалпы тұрғын үй көлемінің кемінде 20%-ы міндетті түрде жетім балаларға және ата-анасының қамқорлығынсыз қалған балаларға беріледі.

Мемлекеттік жалдамалы тұрғын үйді бөлу Бірыңғай республикалық электрондық базаға немесе «Тұрғын үймен қамтамасыз ету орталығы» базасына есепке қою күні бойынша жүзеге асырылады.

Өз кезегіңізді төмендегі сілтеме арқылы тексере аласыз.
Егер сіз есепте тұрмасаңыз, тұрғын үй кезегіне қалай тұру керектігі туралы біздің нұсқаулықпен танысыңыз.

Сондай-ақ отбасының соңғы 6 айдағы табыс деңгейі ескеріледі:

– егер отбасында үш және одан көп адам болса — әрбір отбасы мүшесіне шаққандағы орташа табыс 2 күнкөріс минимумынан аспауы тиіс немесе табыс болмауы мүмкін;

– егер отбасында бір немесе екі адам болса — әрбір отбасы мүшесіне шаққандағы орташа табыс 3,5 күнкөріс минимумынан аспауы тиіс немесе табыс болмауы мүмкін.

Күнкөріс минимумы мөлшері тиісті жылға арналған республикалық бюджет туралы заңмен белгіленеді.

2026 жылы күнкөріс минимумы 50 851 теңгені құрайды.

Бұл отбасының жалпы айлық табысы мына мөлшерден аспауы тиіс дегенді білдіреді:
– 177 979 теңге — бір адам үшін;
– 355 957 теңге — екі адамнан тұратын отбасы үшін;
– 305 106 теңге — үш адамнан тұратын отбасы үшін;
– 406 808 теңге — төрт адамнан тұратын отбасы үшін;
– 508 510 теңге — бес адамнан тұратын отбасы үшін;
– 610 212 теңге — алты адамнан тұратын отбасы үшін.

Отбасының жиынтық табысын есептеу кезінде Қазақстан Республикасының аумағында алынған табыстар ескеріледі.
Есепке мыналар енгізіледі:
– еңбек қызметінен алынатын табыстар;
– жалақының барлық түрлері (кесімді, мерзімді), сыйақылар, қосымша төлемдер, үстемақылар, ынталандырушы және өтемақы төлемдері (ақшалай түрде) қаржыландыру көзіне қарамастан;
– еңбек заңнамасында, еңбек немесе ұжымдық шартта, сондай-ақ жұмыс берушінің актілерінде көзделген төлемдер;
– кәсіпкерлік қызметтен алынатын табыстар.

Мемлекеттік жалдамалы тұрғын үй алу үшін табысты есептеу кезінде мыналар ескерілмейді:
– әлеуметтік төлемдер;
– мүгедектігі бар балаларға күтім жасайтын адамдар алатын зейнетақы төлемдері;
– жетім балалар мен ата-анасының қамқорлығынсыз қалған балалар алатын мемлекеттік стипендиялар.

Мемлекеттік жалдамалы тұрғын үйді бөлу Отбасы банкі арқылы жүзеге асырылады.

Сізге тұрғын үй ұсынылған кезде, Отбасы банкінің сайтындағы жеке кабинетіңізде хабарлама пайда болады. Растау үшін электрондық цифрлық қолтаңбаны (ЭЦҚ) пайдалана отырып, келісім туралы өтінішке қол қою қажет.

Егер келісім 5 жұмыс күні ішінде қол қойылмаса, ұсынылған тұрғын үй кезек бойынша келесі өтініш берушіге автоматты түрде беріледі.

Келісімге қол қойғаннан кейін 2 жұмыс күні ішінде «Тұрғын үймен қамтамасыз ету орталығы» электрондық базасы (orken.otbasybank.kz) арқылы жергілікті атқарушы органмен жалдау шартын жасау қажет.

Егер өтініш берушінің кәмелетке толған отбасы мүшелері болса, олар да 2 жұмыс күні ішінде ЭЦҚ арқылы жалдау шартына қол қоюы тиіс.

Осыдан кейін жергілікті атқарушы орган 2 жұмыс күні ішінде деректерді тексеріп, шартқа қол қояды немесе оған қол қоюдан бас тарту туралы шешім қабылдайды.